கிழக்கு சுவிட்சர்லாந்தில் பயங்கரம்: Thusis நகரில் உணவகம் மற்றும் குடியிருப்புகள் இயங்கிய கட்டிடத்தில் தீ விபத்து!

இந்த விபத்தில் கட்டிடம் முற்றிலும் எரிந்து சாம்பலான நிலையில், கட்டிடத்திற்குள் இருந்த 5 பேரைக் காணவில்லை என காவல்துறை தெரிவிக்கும் தகவல்கள் கூறுகின்றன.தீ விபத்தில் இருந்து 14 பேர் தப்பியோடிய நிலையில், அவர்களில் 8 பேர் காயமடைந்துள்ளனர்.

 காயமடைந்த இருவரின் நிலைமை கவலைக்கிடமாக உள்ளது. காயமடைந்த அனைவரும் மீட்கப்பட்டு அருகில் உள்ள மருத்துவமனைகளில் அனுமதிக்கப்பட்டு தீவிர சிகிச்சை பெற்று வருகின்றனர். கட்டிடத்தின் இரண்டாவது தளத்தில் தொடங்கியதாகக் கருதப்படும் இந்த தீ, படிக்கட்டுகள் இடிந்து விழுந்ததால் வேகமாகப் பரவியது.

 இதனால் சுமார் 100-க்கும் மேற்பட்ட தீயணைப்பு வீரர்கள் வரவழைக்கப்பட்டு, கிரேன் இயந்திரம் மூலம் கூரையைப் பிரித்துத் தீயைக் கட்டுப்படுத்தும் பணியில் ஈடுபட்டனர்.காணாமல் போன 5 பேரைத் தேடும் பணி தீவிரமாக நடைபெற்று வரும் நிலையில், விபத்திற்கான காரணம் குறித்து சுவிஸ் காவல்துறையினரும் வழக்கறிஞர் அலுவலகமும் இணைந்து விசாரணை நடத்தி வருகின்றனர்.