சிலி நாட்டின் பழங்குடியின மூதாதையர் எச்சங்களை ஒப்படைத்தது சுவிட்சர்லாந்தின் பாஸல் நகரம்!

சுவிட்சர்லாந்தின் பாஸல் நகரம் (Basel), தங்களின் அருங்காட்சியகத்தில் வைக்கப்பட்டிருந்த சிலி நாட்டின் பழங்குடியின மூதாதையர்களின் உடல் எச்சங்களை அவர்களின் வம்சாவளியினரிடம் முறைப்படி ஒப்படைத்துள்ளது.

20-ஆம் நூற்றாண்டின் தொடக்கத்தில் தென் அமெரிக்காவின் படகோனியா (Patagonia) பகுதியிலிருந்து சுவிஸ் சேகரிப்பாளர்களால் கொண்டுவரப்பட்ட கவேஸ்கார் (Kawésqar) பழங்குடியினரின் இரண்டு எலும்புக்கூடுகள் மற்றும் ஒரு மண்டை ஓடு ஆகியவை பாஸல் வரலாற்று அருங்காட்சியகத்தில் வைக்கப்பட்டிருந்தன. 

சுவிஸ் நிறுவனங்கள் மேற்கொண்ட வரலாற்று ஆய்வில், அப்போதைய பழங்குடியின மக்களின் அனுமதியின்றி இந்த உடல் எச்சங்கள் சேகரிக்கப்பட்டது உறுதி செய்யப்பட்டது. 

இதனைத் தொடர்ந்து, பாஸல் நகர நிர்வாகம், இயற்கை வரலாற்று அருங்காட்சியகம் மற்றும் பல்கலைக்கழகத்துடன் இணைந்து, அந்த உடல் எச்சங்களை சிலி நாட்டிற்குத் திரும்ப அனுப்ப அதிகாரப்பூர்வமாக முடிவெடுத்தது.