வலிந்து காணாமல் ஆக்கப்பட்டோருக்கான சர்வதேச தினம் இன்று அனுஷ்டிப்பு!

ஒவ்வொரு ஆண்டும் ஆகஸ்ட் 30 ஆம் திகதி சர்வதேச ரீதியில் அனுஷ்டிக்கப்படும் "வலிந்து காணாமல் ஆக்கப்பட்டோருக்கான சர்வதேச தினம்" இன்றாகும். ஐக்கிய நாடுகள் பொதுச் சபையினால் 2010 ஆம் ஆண்டு நிறைவேற்றப்பட்ட தீர்மானத்திற்கு அமைவாக, 2011 ஆம் ஆண்டு முதல் இத்தினம் உலகளாவிய ரீதியில் அதிகாரப்பூர்வமாக அனுஷ்டிக்கப்பட்டு வருகிறது. 

அரச அதிகாரிகளாலோ அல்லது அரச ஆதரவு பெற்ற தரப்பினராலோ ஒரு நபர் கைது செய்யப்பட்டு அல்லது கடத்தப்பட்டு, அவர் இருக்கும் இடம் மறைக்கப்படுவதை 'மனித குலத்திற்கு எதிரான குற்றம்' என ஐ.நா வரையறுத்துள்ளது.  

இலங்கையில் பல தசாப்தங்களாகத் தொடரும் வலிந்து காணாமல் ஆக்கப்பட்டோர் விவகாரத்திற்கு இதுவரை முறையான நீதியோ அல்லது உண்மையோ வெளிவரவில்லை எனக் கூறி, பாதிக்கப்பட்டவர்களின் உறவினர்கள் தொடர்ந்து போராட்டங்களில் ஈடுபட்டு வருகின்றனர்.  

இன்றைய தினத்தை முன்னிட்டு வடக்கு மற்றும் கிழக்கு மாகாணங்களில் வலிந்து காணாமல் ஆக்கப்பட்டோரின் உறவினர்கள் சங்கத்தின் ஏற்பாட்டில் பேரணிகளும் விசேட கவனவீர்ப்புப் போராட்டங்களும் முன்னெடுக்கப்பட்டு வருகின்றன.  

யாழ்ப்பாணம் வீரசிங்கம் மண்டபத்திற்கு அருகில் உள்ள தமிழ் ஆராய்ச்சி மாநாட்டு நினைவுத் தூபியிலிருந்து பேரணி ஆரம்பிக்கப்பட்டு தந்தை செல்வா கலையரங்கம் வரை சென்றடைந்தது. சர்வதேச சமூகத்தின் நேரடித் தலையீட்டின் மூலமே தமக்கு நியாயமான நீதி கிடைக்கும் என்பதை அவர்கள் மீண்டும் வலியுறுத்தியுள்ளனர்.