கினியாவில் சோகம்: குப்பை மலை சரிந்து விழுந்ததில் 30 பேர் பரிதாப பலி!

கினியாவின் தலைநகர் கோனாக்ரியில் உள்ள மிகப்பெரிய குப்பை கிடங்கில், மலைபோல் குவிந்திருந்த குப்பைகள் சரிந்து விழுந்ததில் 30 பேர் உயிரிழந்துள்ளனர்.

அதிகாலை 2 மணியளவில் பெய்த கனமழையால் தார் எஸ் சலாம் பகுதியில் குப்பைகள் சரிந்து, அருகில் இருந்த குடிசைகள் புதையுண்டதாக அதிகாரிகள் தெரிவித்துள்ளனர். இந்த விபத்தில் 6 பேர் பலத்த காயமடைந்துள்ளதுடன், பல வீடுகளும் சேதமடைந்துள்ளன.

இடிபாடுகளுக்குள் சிக்கியுள்ளவர்களை மீட்கும் பணிகள் தொடர்ந்து நடைபெற்று வருகின்றன. இந்த திறந்தவெளி குப்பை கிடங்கை மூடுவதற்கு ஏற்கனவே திட்டமிடப்பட்டிருந்ததாக அதிகாரிகள் தெரிவித்துள்ளனர்.

குப்பை கிடங்கைச் சுற்றியுள்ள பகுதிகளில் வசிப்பவர்களுக்கு வெளியேறுமாறு ஏற்கனவே அறிவுறுத்தப்பட்டிருந்தது. இருப்பினும், விபத்து நடந்தபோது பல குடும்பங்கள் அங்கேயே இருந்ததாக கூறப்படுகிறது.

மீதமுள்ள குடும்பங்களை பாதுகாப்பான பகுதிகளுக்கு மாற்ற நடவடிக்கை எடுக்கப்படும் என அதிகாரிகள் தெரிவித்துள்ளனர்.