சூரிச் ஓய்வூதிய நிதி மற்றும் சுவிஸ் தபால் துறையைப் பாதித்த இணையவழித் தாக்குதல்!

கடந்த செப்டம்பர் மாத இறுதியில் இந்தத் தாக்குதல் நடந்ததாக சூரிச் நகரம் தெரிவித்துள்ளது. எத்தனை பேர் பாதிக்கப்பட்டுள்ளனர், என்னென்ன தகவல்கள் திருடப்பட்டுள்ளன என்பதைக் கண்டறியும் நடவடிக்கைகள் நடைபெற்று வருகின்றன. பெயர், முகவரி, மின்னஞ்சல், தொலைபேசி எண், சமூகப் பாதுகாப்பு எண், வங்கிக் கணக்கு விவரங்கள் மற்றும் ஓய்வூதியம் தொடர்பான தகவல்கள் கசிந்திருக்கக்கூடும் என அச்சம் தெரிவிக்கப்பட்டுள்ளது. இது தொடர்பாக குற்றவியல் புகாரும் பதிவு செய்யப்பட்டுள்ளது.

சுவிஸ் தபால் நிறுவனத்தின் ஓய்வூதிய நிதியும் இந்தத் தாக்குதலால் பாதிக்கப்பட்டிருக்கலாம் எனத் தெரிவித்துள்ளது. பெயர், பிறந்த தேதி, தொடர்பு விவரங்கள், சமூகப் பாதுகாப்பு எண் மற்றும் ஓய்வூதிய விவரங்கள் உள்ளிட்ட தகவல்கள் ஆபத்தில் இருக்கக்கூடும். எனினும், ஓய்வூதியச் சொத்துகளும் ஓய்வூதியக் கொடுப்பனவுகளும் பாதுகாப்பாக இருப்பதாக இரு நிறுவனங்களும் தெரிவித்துள்ளன. ஓய்வூதிய நிர்வாக அமைப்புகள் நேரடியாகப் பாதிக்கப்பட்டதாகத் தகவல் இல்லை.

இதற்கிடையில், பெர்ன் ஓய்வூதிய நிதி மற்றும் பெர்ன் ஆசிரியர் காப்பீட்டு நிதி ஆகியவற்றிலிருந்தும் தரவுகள் திருடப்பட்டிருப்பது கடந்த வாரம் தெரியவந்தது. சுவிட்சர்லாந்தின் பல ஓய்வூதிய நிறுவனங்களைப் பாதித்துள்ள இந்தச் சம்பவம், தனிப்பட்ட தரவுகளின் பாதுகாப்பு குறித்த கவலையை அதிகரித்துள்ளது.