நடுவானில் குவைத் விமானத்தில் ஆண் குழந்தையைப் பெற்றெடுத்த இலங்கைப் பணிப்பெண்!

திருகோணமலையைச் சேர்ந்த 30 வயதுடைய பெண் ஒருவரே, இன்று அதிகாலை குவைத்திலிருந்து கட்டுநாயக்க நோக்கிப் புறப்பட்ட 'ஜசீரா' விமானத்தில் பயணித்த போது இவ்வாறு குழந்தையைப் பிரசவித்துள்ளார்.

குறித்த பெண் தனது கர்ப்பிணி நிலையை மறைத்துப் பயணித்துள்ளதாகத் தெரிவிக்கப்படும் நிலையில், நடுவானில் அவருக்குப் பிரசவ வலி ஏற்பட்டுள்ளது. இதனைத் தொடர்ந்து, விமானப் பணிக்குழாமினரின் உதவியுடன் பிரசவம் வெற்றிகரமாக நடைபெற்றுள்ளது.

விமானி வழங்கிய தகவலுக்குமைய, கட்டுநாயக்க விமான நிலையத்தில் மருத்துவக் குழுவினர் தயாராக நிறுத்தி வைக்கப்பட்டிருந்தனர். விமானம் தரையிறங்கியதும் தாயும் சேயும் மேலதிக சிகிச்சைகளுக்காக நீர்கொழும்பு போதனா வைத்தியசாலையில் அனுமதிக்கப்பட்டதுடன், இருவரும் தற்போது நலமுடன் இருப்பதாக வைத்தியசாலை வட்டாரங்கள் தெரிவிக்கின்றன.