டுபாயில் கைது செய்யப்பட்ட இலங்கை பாதாள உலகக் குற்றவாளிகள் இருவரை நாட்டுக்கு அழைத்து வர நடவடிக்கை!

டுபாயில் கைது செய்யப்பட்டுள்ள இலங்கையின் முக்கிய திட்டமிட்ட குற்றவாளிகளான ‘பஸ் லலித்’ (லலித் கன்னங்கர) மற்றும் ‘வனதே சத்து’ (அவிஷ்க மதுஷன்) ஆகிய இருவரையும் நாட்டிற்கு அழைத்து வர நடவடிக்கை எடுக்கப்பட்டுள்ளதாக இலங்கை காவல்துறை அறிவித்துள்ளது.

இலங்கையில் பல கொலைச் சம்பவங்கள், போதைப்பொருள் கடத்தல் மற்றும் பாதாள உலகக் குழு நடவடிக்கைகளுடன் தொடர்புடைய முக்கிய சந்தேகநபர்கள் சர்வதேச பொலிஸின் சிவப்பு அறிவித்தலுக்கு அமைவாக, ஐக்கிய அரபு அமீரக பாதுகாப்பு அதிகாரிகளால் டுபாயில் வைத்து கைது செய்யப்பட்டனர்.  

டுபாய் பாதுகாப்புப் படையினரால் கைது செய்யப்பட்ட இவர்களை மீள இலங்கைக்கு அழைத்து வருவதற்காக, சிரேஷ்ட பொலிஸ் அத்தியட்சகர் தலைமையிலான சிறப்பு பொலிஸ் குழுவொன்று டுபாய் நோக்கிப் பயணமாகியுள்ளது.  

கைது செய்யப்பட்ட சந்தேகநபர்கள் இருவரிடமும் மேற்கொள்ளப்பட்ட பூர்வாங்க விசாரணைகளைத் தொடர்ந்து, அவர்கள் இலங்கையில் மேற்கொண்ட குற்றச் செயல்கள் மற்றும் அதற்குப் பயன்படுத்தப்பட்ட ஆயுதங்கள் குறித்த முக்கிய தகவல்கள் வெளிவந்துள்ளதாக காவல்துறை ஊடகப் பிரிவு தெரிவித்துள்ளது.  

டுபாயில் இருந்து அழைத்து வரப்படும் இவர்கள், மேலதிக விசாரணைகளுக்காகக் குற்றப் புலனாய்வுத் திணைக்களம் மற்றும் கொழும்பு குற்றத்தடுப்புப் பிரிவிடம் ஒப்படைக்கப்படவுள்ளனர்.

வெளிநாடுகளில் தலைமறைவாக உள்ள ஏனைய குற்றவாளிகளையும் கைது செய்வதற்கான சர்வதேச நடவடிக்கைகள் தீவிரப்படுத்தப்பட்டுள்ளதாக காவல்துறை மேலும் தெரிவித்துள்ளது.