36 ஆண்டுகளுக்குப் பின் காங்கேசன்துறையில் புதிய தபால் நிலையக் கட்டடப் பணிகள் ஆரம்பம்!

இலங்கையில் நிலவிய உள்நாட்டுப் போர் காரணமாக, கடந்த 1990-ஆம் ஆண்டு வலிகாமம் வடக்குப் பகுதியிலிருந்து மக்கள் இடம்பெயர்ந்ததைத் தொடர்ந்து, காங்கேசன்துறை தபால் நிலையத்தின் செயற்பாடுகளும் அதன் சொந்த இடத்திலிருந்து வேறு இடத்திற்கு மாற்றப்பட்டன. பின்னர், அப்பகுதியில் மக்கள் மீள்குடியேற அனுமதிக்கப்பட்டதைத் தொடர்ந்து, அத்தபால் நிலையம் தனியார் கட்டடமொன்றில் தற்காலிகமாக இயங்கி வந்தது.

இந்நிலையில், காங்கேசன்துறை உப தபால் நிலையம் அமைந்திருந்த பகுதியில், 32.09 மில்லியன் ரூபாய்க்கும் அதிகமான செலவில் புதிய தபால் நிலையத்தை நிர்மாணிப்பதற்கான அடிக்கல் இன்று நாட்டப்பட்டுள்ளது. இதற்கான கட்டுமானப் பணிகளை எதிர்வரும் மே மாதம் பத்தாம் திகதிக்கு முன்னர் நிறைவு செய்யத் திட்டமிடப்பட்டுள்ளது.

சுகாதாரம் மற்றும் வெகுஜன ஊடக அமைச்சர் வைத்தியர் நளிந்த ஜயதிஸ்ஸ மற்றும் கடற்றொழில், நீரியல் மற்றும் கடல்வளங்கள் அமைச்சர் இராமலிங்கம் சந்திரசேகர் ஆகியோர் தலைமையில் நடைபெற்ற இந்நிகழ்வில், பாராளுமன்ற உறுப்பினர் ச. பவானந்தராஜா மற்றும் அரச அதிகாரிகள், அரசியல் பிரதிநிதிகள் எனப் பலரும் கலந்துகொண்டனர்.