மணிப்பூரில் கொடூரம்: காணாமல் போன 2 இளைஞர்களின் உடல்கள் சாக்குப்பையில் மீட்பு - வெடித்தது மக்கள் போராட்டம்!

மணிப்பூரின் காங்போக்பி மாவட்டத்தில் உள்ள தபாவு குகி கிராமத்தைச் சேர்ந்த 21 வயதான டி. சோங்லாய் மற்றும் 20 வயதான பாவோகின்லால் ஹாங் சிங் ஆகியோர் கடந்த அக்டோபர் 29-ஆம் தேதி திடீரெனக் காணாமல் போயினர்.

அவர்களைத் தேடும் பணி தீவிரமாக நடைபெற்று வந்த நிலையில், இன்று இரு இளைஞர்களின் உடல்களும் கொடூரமான முறையில் சிதைக்கப்பட்டு சாக்குப்பையில் அடைக்கப்பட்ட நிலையில் கண்டெடுக்கப்பட்டுள்ளன.

இந்தக் கொடூரச் சம்பவம் குறித்த தகவல் பரவியதும், ஆத்திரமடைந்த நூற்றுக்கணக்கான கிராம மக்கள் மற்றும் இளைஞர்கள் வீதிகளில் இறங்கிப் போராட்டத்தில் ஈடுபட்டனர். குற்றவாளிகளை உடனடியாகக் கைது செய்ய வலியுறுத்தி அவர்கள் பேரணியாகச் செல்ல முயன்றபோது, பாதுகாப்புப் படையினருக்கும் போராட்டக்காரர்களுக்கும் இடையே கடுமையான மோதல் ஏற்பட்டது.

இதனைத் தொடர்ந்து, கூட்டத்தைக் கலைக்கவும் கட்டுப்படுத்தவும் பாதுகாப்புப் படையினர் கண்ணீர்ப்புகைக் குண்டுகளை வீசியும் தடியடி நடத்தியும் பேரணியைக் கலைத்தனர். தற்போது அப்பகுதியில் பதற்றம் நீடிப்பதால் கூடுதல் ராணுவத்தினரும் பொலிஸாரும் பாதுகாப்புப் பணியில் ஈடுபடுத்தப்பட்டுள்ளனர்.