மஹரகம அபேக்ஷா மருத்துவமனையில் CT சிமுலேட்டர் பழுது: 1,500 நோயாளர்கள் பாதிப்பு!

புதிய இயந்திரத்தின் மென்பொருளானது கதிர்வீச்சு திட்டமிடலுக்குப் பயன்படுத்தப்படும் மென்பொருளுடன் பொருந்தாததால், கடந்த ஏப்ரல் இறுதியில் பழைய இயந்திரம் அகற்றப்பட்டும், புதிய இயந்திரத்தின் சோதனைக் கட்டத்தைக்கூட இதுவரை ஆரம்பிக்க முடியவில்லை எனத் தெரிவிக்கப்பட்டுள்ளது.

இந்தத் தொழில்நுட்பக் கோளாறு காரணமாக Linear Accelerator கதிர்வீச்சு சிகிச்சைகளைத் தொடங்க முடியாத நிலை ஏற்பட்டுள்ளதுடன், குறித்த காலத்திற்குள் சிகிச்சை பெறாவிட்டால் புற்றுநோய் செல்களை அழிப்பதில் தீவிர சிக்கல்கள் ஏற்படும் எனவும் எச்சரிக்கப்பட்டுள்ளது.

இத்தகைய சிகிச்சைகளைத் தனியார் மருத்துவமனைகளில் பெற ஒரு நோயாளிக்கு 5 இலட்சம் முதல் 20 இலட்சம் ரூபாய் வரை செலவிட வேண்டியுள்ளதால், சாதாரண நோயாளர்கள் கடும் பொருளாதாரச் சுமை மற்றும் அசௌகரியங்களை எதிர்கொண்டுள்ளனர்.

இது குறித்துச் சுகாதார அமைச்சின் அதிகாரிகளுக்குப் பல மாதங்களாகத் தெரிவித்தும் இதுவரை எந்தவிதமான சாதகமான பதிலும் கிடைக்கவில்லை எனச் சங்கத்தின் தலைவர் சானக்க தர்மவிக்ரம குற்றம் சுமத்தியுள்ளார்.