அர்னாப் புயல் பேரழிவு: 5,800 குடும்பங்கள் பாதிப்பு – மீட்புப் பணிகள் தீவிரமடைவு!

கடந்த மாதம் 23 ஆம் திகதி முதல் இன்று (01) வரையிலான காலப்பகுதியில் பதிவாகியுள்ள தரவுகளின் அடிப்படையில், நாடு முழுவதிலும் உள்ள 19 மாவட்டங்களைச் சேர்ந்த 137 பிரதேச செயலகப் பிரிவுகள் இந்தச் சீரற்ற காலநிலையால் பாதிக்கப்பட்டுள்ளன.  

இந்தத் பேரிடர்களால் ஏற்பட்ட விபத்துகள் மற்றும் அனர்த்தங்களால் இதுவரை 06 பேர் உயிரிழந்துள்ளனர்; 08 பேர் காயமடைந்துள்ளனர். மேலும் 03 பேரைக் காணவில்லை அவர்களைத் தேடும் பணிகள் தீவிரமாக நடைபெற்று வருகின்றன.

சேத விவரங்களைப் பொறுத்தவரை, நாடு முழுவதும் 8 வீடுகள் முழுமையாகவும், 737 வீடுகள் பகுதியளவிலும் சேதமடைந்துள்ளதாகப் பதிவாகியுள்ளன.  இந்தச் சீரற்ற காலநிலையினால் இரத்தினபுரி மாவட்டமே அதிகளவு பாதிப்புக்குள்ளாகியுள்ளது. 

அங்குள்ள 15 பிரதேச செயலகப் பிரிவுகளில் 2,666 குடும்பங்களைச் சேர்ந்த 10 ஆயிரத்து 51 பேர் பாதிக்கப்பட்டுள்ளனர்.  இரண்டாவதாக அதிக பாதிப்பு புத்தளம் மாவட்டத்திற்கு ஏற்பட்டுள்ளது. 

அங்குள்ள 11 பிரதேச செயலகப் பிரிவுகளில் 1,850 குடும்பங்களைச் சேர்ந்த 6 ஆயிரத்து 900 பேர் பாதிக்கப்பட்டுள்ளதாக அனர்த்த முகாமைத்துவ நிலையம் குறிப்பிட்டுள்ளது.பாதிக்கப்பட்ட பகுதிகளில் மீட்பு மற்றும் நிவாரணப் பணிகள் தொடர்ந்தும் முன்னெடுக்கப்பட்டு வருவதாக அனர்த்த முகாமைத்துவ நிலையம் தெரிவித்துள்ளது.