மட்டக்களப்பு மாவட்ட SLPP புதிய அமைப்பாளராக தெய்வேந்திரராசா புலேந்திரன் நியமனம்!

ஸ்ரீலங்கா பொதுஜன பெரமுன கட்சியின் தலைவரும் முன்னாள் ஜனாதிபதியுமான மஹிந்த ராஜபக்ஷவினால், மட்டக்களப்பு மாவட்டத்திற்கான கட்சியின் புதிய அமைப்பாளராக தெய்வேந்திரராசா புலேந்திரன் நியமிக்கப்பட்டுள்ளார்.

இதனைத் தொடர்ந்து, மட்டக்களப்பு மாவட்டத்தின் எதிர்கால அரசியல் செயற்பாடுகள், அபிவிருத்தித் திட்டங்கள் மற்றும் மக்களின் வாழ்வாதாரப் பிரச்சினைகள் தொடர்பாக ஊடகச் சந்திப்பு நடைபெற்றது.

இதில் கருத்து தெரிவித்த புதிய அமைப்பாளர், மட்டக்களப்பு–கிரான் பாலம் மற்றும் தற்போதைய அரசாங்கத்தால் முன்னெடுக்கப்படும் வீதிப் புனரமைப்புப் பணிகள் தரமற்ற முறையில் இடம்பெறுவதாக குற்றம்சாட்டினார்.

மழைக்காலங்களில் மக்கள் எதிர்கொள்ளும் பாதிப்புகளைத் தவிர்க்க, உறுதியான உட்கட்டமைப்புகளை உருவாக்க வேண்டும் என்றும் அவர் வலியுறுத்தினார்.

மேலும், மட்டக்களப்பு மாவட்டத்தில் வேலைவாய்ப்பின்றி உள்ள பட்டதாரிகளுக்கு முன்னுரிமை அடிப்படையில் தொழில் வாய்ப்புகளை ஏற்படுத்துவதே தனது முதன்மை இலக்கு என்றும் தெய்வேந்திரராசா புலேந்திரன் தெரிவித்தார்.

மாவட்டத்தில் வாழும் தமிழ், சிங்கள மற்றும் முஸ்லிம் மக்களின் பிரச்சினைகளுக்கு தீர்வு காணவும், இளைஞர்களுக்கு வேலைவாய்ப்புகளை உருவாக்கவும் இணைந்து செயற்படத் தயாராக இருப்பதாக கட்சியின் மாவட்ட ஆலோசகர் ராஜன் மயில்வாகனம் தெரிவித்துள்ளார்.