கிரான்ஸ்-மொன்டானா ஹோட்டல் தீ விபத்து – இத்தாலியப் பயணிகளின் மருத்துவச் செலவை ஏற்கும் சுவிட்சர்லாந்து!

இதற்காகச் சுமார் 15 லட்சம் சுவிஸ் பிராங்குகள் செலவாகும் என மதிப்பிடப்பட்டுள்ளது. இந்தச் சிறப்பு சூழ்நிலையைக் கருத்தில் கொண்டு, மருத்துவச் செலவுகளைத் திரும்பப் பெறும் நடவடிக்கையைத் தவிர்ப்பதாக சுவிஸ் கூட்டாட்சி கவுன்சில் அறிவித்துள்ளது.

முன்னதாக, மருத்துவக் கட்டணங்களைப் பாதிக்கப்பட்டவர்களின் குடும்பத்தினருக்கு அனுப்பிய விவகாரம், இத்தாலி மற்றும் சுவிட்சர்லாந்து இடையிலான உறவில் நெருக்கடியை ஏற்படுத்தியிருந்தது. இந்நிலையில், சுவிட்சர்லாந்தின் முடிவை வரவேற்றுள்ள இத்தாலியப் பிரதமர் ஜோர்ஜியா மெலோனி, சுவிஸ் ஜனாதிபதி கய் பார்மெலினுக்கு நன்றி தெரிவித்துள்ளார். இந்த முடிவு இரு நாடுகளுக்கும் இடையிலான உறவின் வலிமையை வெளிப்படுத்துவதாகவும் அவர் குறிப்பிட்டுள்ளார்.

ஐரோப்பிய ஒன்றியத்தின் சுதந்திரப் பயண ஒப்பந்தத்தின்படி, பொதுவாக ஒவ்வொரு நாடும் தனது காப்பீடு செய்யப்பட்ட குடிமக்களின் மருத்துவச் செலவுகளை ஏற்க வேண்டும். இருப்பினும், விதிவிலக்குகளுக்கு அனுமதி உள்ளது. இந்த முடிவால், துயரத்தில் இருக்கும் பாதிக்கப்பட்ட குடும்பங்களுக்கு மேலதிகமாக ஏற்பட்டிருந்த பெரும் நிதிச் சுமை நீங்கியுள்ளது.