இந்திய தொழிலதிபர் சுனில் மிட்டலுக்கு பிரான்ஸின் உயரிய 'செவாலியே' விருது!

இந்தியா மற்றும் பிரான்ஸ் நாடுகளுக்கு இடையிலான பொருளாதார மற்றும் வர்த்தக உறவுகளை வலுப்படுத்துவதில் ஆற்றிய சிறந்த பங்களிப்பைப் பாராட்டும் வகையில், பிரான்ஸ் அதிபர் எமானுவேல் மேக்ரான் இந்த விருதை அவருக்கு வழங்கவுள்ளார்.

1992-ல் ஏர்டெல் (Airtel) நிறுவனத் தொடக்க காலத்தில் பிரான்ஸின் 'Compagnie Générale des Eaux' நிறுவனத்துடன் இணைந்தது முதல், தற்போது ஐரோப்பிய செயற்கைக்கோள் சேவை நிறுவனமான 'Eutelsat'-ன் இணைத் தலைவராகச் செயல்படுவது வரை பிரான்ஸ் உடனான சுனில் மிட்டலின் தொழில்முறைப் பங்களிப்பு தொடர்கிறது.

புதுடெல்லியில் உள்ள பிரான்ஸ் தூதரகத்தில் எதிர்வரும் அக்டோபர் 28 அன்று நடைபெறவுள்ள சிறப்பு விழாவில் அவருக்கு இந்த விருதுக்கான பதக்கம் அதிகாரப்பூர்வமாக வழங்கி கௌரவிக்கப்படவுள்ளது.

இந்த கௌரவம் குறித்து கருத்து தெரிவித்துள்ள சுனில் மிட்டல், பிரெஞ்சு அரசு மற்றும் அதிபர் எமானுவேல் மேக்ரானுக்குத் தனது நெஞ்சார்ந்த நன்றியைத் தெரிவித்துக் கொண்டதுடன், இரு நாடுகளிடையேயான பொருளாதாரப் பிணைப்பை மேலும் வலுப்படுத்தப் பாடுபடுவதாகக் குறிப்பிட்டுள்ளார்.

ஏற்கனவே 2007-ல் இந்தியாவின் உயரிய பத்ம பூஷண் விருதையும், 2024-ல் பிரித்தானிய மன்னர் மூன்றாம் சார்லஸிடமிருந்து கெளரவ நைட் பட்டம் (KBE) பெற்ற சுனில் மிட்டலுக்கு, பிரான்ஸின் இந்த மிக உயரிய சர்வதேச கௌரவமும் கிடைத்துள்ளமை குறிப்பிடத்தக்கது.