குருநாகலில் சட்டவிரோத விலங்கு வேட்டைக் கருவிகளை அகற்ற சிறப்பு நடவடிக்கை

கல்கமுவ பிரதேச செயலகப் பிரிவுக்கு உட்பட்ட மூன்று கிராம அலுவலர் பிரிவுகளில், கடந்த அக்டோபர் 6 மற்றும் 7ஆம் தேதிகளில் இரண்டு நாட்கள் இந்த நடவடிக்கை மேற்கொள்ளப்பட்டது. வனவிலங்கு பாதுகாப்புத் திணைக்களம், சிவில் பாதுகாப்புத் திணைக்களம் மற்றும் விசேட அதிரடிப்படை ஆகியவற்றைச் சேர்ந்த சுமார் 60 அதிகாரிகள் இதில் பங்கேற்றனர்.

இதன்போது, குளங்களின் நீர்ப்பிடிப்புப் பகுதிகள் மற்றும் புதர்நிலங்களில் வைக்கப்பட்டிருந்த ஏராளமான விலங்குப் பொறிகளும், விலங்குகளைக் காயப்படுத்த அல்லது கொல்லப் பயன்படுத்தப்படும் வெடிக்கும் தன்மையுடைய “ஹக்கா படாஸ்” கருவிகளும் அகற்றப்பட்டன.

மேலும், சட்டவிரோத துப்பாக்கிகள், வெடிக்கும் கருவிகள், விலங்குப் பொறிகள், வேட்டையாடப்பட்ட விலங்குகளின் இறைச்சி மற்றும் விலங்குகளின் உடல் பாகங்களை வைத்திருந்ததாகக் கூறப்படும் பல சந்தேகநபர்களும் தனித்தனி சோதனைகளின்போது கைது செய்யப்பட்டுள்ளனர்.

காட்டு யானைகள் அதிகம் நடமாடும் பகுதிகளுக்கு முன்னுரிமை அளித்து, இதுபோன்ற நடவடிக்கைகளைத் தொடர்ந்து முன்னெடுக்கத் திட்டமிட்டுள்ளதாக வனவிலங்கு பாதுகாப்புத் திணைக்களம் தெரிவித்துள்ளது.