சட்டத்தை மீறும் பொலிஸாருக்குக் கடுமையான தண்டனை: பொலிஸ் ஊடகப் பேச்சாளர் எஃப்.யு. வூட்லர் எச்சரிக்கை!

கொழும்பில் இன்று நடைபெற்ற ஊடகவியலாளர் சந்திப்பில் உரையாற்றிய அவர், தவறிழைக்கும் அதிகாரிகளுக்கு எதிராகச் சட்டரீதியாகவும் ஒழுக்காற்று ரீதியாகவும் மிகக் கடுமையான நடவடிக்கைகள் எடுக்கப்படும் எனக் குறிப்பிட்டார்.

இதனிடையே, ஹோமாகம பொலிஸ் காவலில் சந்தேகநபர் உயிரிழந்த சம்பவம் தொடர்பில் பொலிஸ் மா அதிபரின் நேரடி வழிகாட்டலில் மேல் மாகாண தெற்குப் பிரிவின் விசேட குழு விசாரணை நடத்தி வருகின்றது. இச்சம்பவம் தொடர்பாக ஹோமாகம தலைமையகப் பொலிஸ் பரிசோதகர், குற்றத்தடுப்புப் பிரிவின் பொறுப்பதிகாரி உட்பட நான்கு பொலிஸ் அதிகாரிகள் பணி இடைநீக்கம் செய்யப்பட்டுள்ளதுடன், உப பொலிஸ் பரிசோதகர் ஒருவர் கைது செய்யப்பட்டுள்ளார்.

அதேவேளை, கொபெய்கனே பொலிஸ் காவலில் இருந்த சந்தேகநபர் வைத்தியசாலையில் அனுமதிக்கப்பட்ட பின்னர் உயிரிழந்த சம்பவம் தொடர்பில், தாக்குதலில் ஈடுபட்டதாகச் சந்தேகிக்கப்படும் பொதுமக்கள் மூவர் கைது செய்யப்பட்டுள்ளதுடன், விசேட விசாரணைகளும் ஆரம்பிக்கப்பட்டுள்ளன.

மேலும், திருகோணமலை பொலிஸ் காவலில் இருந்த மூன்று சந்தேகநபர்களுக்கு வெட்டுக்காயங்கள் ஏற்பட்டமை குறித்துப் பிரிவுப் பொறுப்பதிகாரியிடம் அறிக்கை கோரப்பட்டுள்ளதாகவும் பொலிஸ் ஊடகப் பேச்சாளர் மேலும் தெரிவித்தார்.