இலங்கையில் ஏற்பட்ட திடீர் மின் தடை: விசாரணை அறிக்கையைப் பெற்றது பொதுப் பயன்பாடுகள் ஆணைக்குழு!

ஒக்டோபர் 17 ஆம் திகதி நாடளாவிய ரீதியில் ஏற்பட்ட மின்சாரத் தடையுடன் தொடர்புடைய ஆரம்பகட்ட விசாரணை அறிக்கையை தேசிய மின் கட்டமைப்பு செயற்பாட்டாளர் (National System Operator – NSO), இலங்கை பொதுப் பயன்பாடுகள் ஆணைக்குழுவிடம் (PUCSL) சமர்ப்பித்துள்ளது. 

குறித்த அறிக்கையின்படி, சம்பவம் இடம்பெற்ற தினம் முற்பகல் 11.43 மணியளவில் நுரைச்சோலை லக்விஜய மின் உற்பத்தி நிலையத்தின் முதலாவது மின் உற்பத்தி அலகில் இருந்து உற்பத்தி செய்யப்பட்ட 187 மெகாவோட் மின்சாரம், வெறும் 450 மில்லி செக்கன்களுக்குள் தேசிய மின் கட்டமைப்பிலிருந்து துண்டிக்கப்பட்டுள்ளது.

இதன் காரணமாக மின் கட்டமைப்பின் அதிர்வெண் (Frequency) வேகமாக வீழ்ச்சியடைந்து 48.75 ஹேர்ட்ஸ் ஆகக் குறைந்துள்ளது. 

இதனைத் தொடர்ந்து, சம்பவம் இடம்பெற்ற 4.1 செக்கன்களுக்குள் நாட்டின் முழுமையான மின் கட்டமைப்பும் சரிந்துள்ளதாக அந்த அறிக்கையில் குறிப்பிடப்பட்டுள்ளது.

மின் கட்டமைப்பின் அதிர்வெண் வீழ்ச்சியடையும் சந்தர்ப்பங்களில் அதன் நிலைத்தன்மையைப் பாதுகாப்பதற்காகச் செயற்படுத்தப்படும், அதிர்வெண் குறைவு அடிப்படையிலான மின்சுமை துண்டிப்பு பொறிமுறையின் (Under Frequency Load Shedding – UFLS) ஐந்து கட்டங்களும் குறித்த சம்பவத்தின்போது செயல்படுத்தப்பட்டுள்ளன.

இதற்கமைய, மொத்தமாக 449.2 மெகாவோட் மின்சார விநியோகம் துண்டிக்கப்பட்டுள்ளது. 

மின்சாரத் தடை ஏற்படுவதற்கு முன்னர் தேசிய மின் கட்டமைப்பில் காணப்பட்ட 1,135 மெகாவோட் மொத்த மின் உற்பத்தியில் இது 39.6 சதவீதமாகும்.

எனினும், பாதுகாப்பு பொறிமுறைகள் அனைத்தும் செயல்படுத்தப்பட்ட போதிலும், தேசிய மின் கட்டமைப்பு முழுமையாகச் சரிவடைவதைத் தடுக்க முடியவில்லை என ஆரம்பகட்ட அறிக்கையில் சுட்டிக்காட்டப்பட்டுள்ளது.