இலங்கையில் பாதுகாப்பற்ற சாலைகளை சீரமைக்க ரூ.150 கோடி திட்டம்

தேசிய நெடுஞ்சாலை அமைப்புக்கு உட்படாத சாலைகளில் உள்ள ஆபத்தான பகுதிகளை கண்டறிந்து, தேவையான பாதுகாப்பு நடவடிக்கைகளை மேற்கொள்ள இந்தத் திட்டம் செயல்படுத்தப்படுகிறது. ஒவ்வொரு மாவட்டத்திற்கும் தலா ரூ.6 கோடி ஒதுக்கப்பட்டுள்ளது.

இதற்காக உள்ளாட்சி அமைப்புகளுடன் நேற்று புரிந்துணர்வு ஒப்பந்தங்கள் கையெழுத்தாகின. அந்தந்த மாவட்டங்களில் ஆபத்தான சாலை பகுதிகளை அடையாளம் கண்டு, விரைவாக பாதுகாப்பு நடவடிக்கைகளை மேற்கொள்ள உள்ளாட்சி அமைப்புகள் செயல்படும்.

போக்குவரத்து, நெடுஞ்சாலைகள் மற்றும் நகர அபிவிருத்தி அமைச்சர் பிமல் ரத்நாயக்க முன்வைத்த அமைச்சரவை பத்திரத்திற்கு கடந்த ஜூன் 1-ஆம் தேதி அமைச்சரவை ஒப்புதல் வழங்கியதைத் தொடர்ந்து இந்தத் திட்டம் தொடங்கப்பட்டுள்ளது.

தேசிய சாலை பாதுகாப்பு கவுன்சில், திட்டத்தின் தொழில்நுட்ப பணிகள் மற்றும் முன்னேற்றத்தை கண்காணித்து, உள்ளாட்சி அமைப்புகளுக்கு தேவையான வழிகாட்டுதல்களை வழங்கும்.

இந்த புரிந்துணர்வு ஒப்பந்தங்கள் டிசம்பர் 31, 2026 வரை நடைமுறையில் இருக்கும். சாலைகளில் உள்ள ஆபத்தான பகுதிகளை விரைவாக பாதுகாப்பானதாக மாற்றுவதன் மூலம் விபத்துகளை குறைத்து, சாலைப் பயணிகளின் பாதுகாப்பை உறுதி செய்வதே திட்டத்தின் நோக்கமாகும்.