10 இலட்சம் ரூபாய் கப்பம் கேட்டு கொலை மிரட்டல்: உனவட்டுனவில் இருவர் கைது!

உனவட்டுன பகுதியில் தொலைபேசி வழியே தொடர்பு கொண்டு, 10 லட்சம் ரூபாய் கப்பத் தொகை கோரி கொலை மிரட்டல் விடுக்கப்படுவதாக மத்திய குற்றத் தடுப்புப் பணியகத்திற்கு நேற்றைய தினம் முறைப்பாடு ஒன்று கிடைத்தது.

இந்த முறைப்பாட்டின் அடிப்படையில் தீவிர விசாரணை மேற்கொண்ட மத்திய குற்றத் தடுப்புப் பணியக அதிகாரிகள், சம்பவத்துடன் தொடர்புடைய 36 மற்றும் 19 வயதுடைய இரண்டு சந்தேகநபர்களை அதிரடியாகக் கைது செய்தனர்.

கைது செய்யப்பட்ட இருவரும் உனவட்டுன பகுதியைச் சேர்ந்தவர்கள் என்றும், தங்களை அப்பகுதியின் ஒழுங்கமைக்கப்பட்ட பாதாள உலகக் குற்றவாளிகளாகக் காட்டிக்கொண்டு இந்த அச்சுறுத்தல் அழைப்புகளை மேற்கொண்டுள்ளதும் ஆரம்பகட்ட விசாரணைகளில் தெரியவந்துள்ளது.

சம்பவம் தொடர்பில் மத்திய குற்றத் தடுப்புப் பணியகத்தினர் மேலதிக விசாரணைகளை முன்னெடுத்து வருகின்றனர்.