எளிய தவணை வீடு மோசடி வழக்கில் 2 பெண்கள் கைது

மிரிஹான சிறப்பு குற்றப் புலனாய்வுப் பிரிவினர் 30 மற்றும் 31 வயதுடைய இரு பெண்களை கடந்த வியாழக்கிழமை கைது செய்தனர். இவர்கள் மோசடி செய்ததாக குற்றம்சாட்டப்பட்ட தனியார் நிறுவனத்தில் தலைமை விற்பனை மேலாளராகவும், செயல்பாட்டு அதிகாரியாகவும் பணியாற்றியவர்கள் என காவல்துறை தெரிவித்துள்ளது.

எளிய தவணை திட்டத்தின் கீழ் வீடுகள் கட்டித் தருவதாக கூறி பொதுமக்களிடம் பெரும் தொகை பணம் வசூலித்தும், வீடுகளை கட்டித் தரவில்லை என அந்த நிறுவனத்திற்கு எதிராக 245 புகார்கள் கிடைத்துள்ளன.

கைது செய்யப்பட்ட இருவரிடமிருந்தும் நான்கு கார்கள் பறிமுதல் செய்யப்பட்டுள்ளன. இந்த நிறுவனத்தின் இயக்குநர் கடந்த ஜூலை 28-ஆம் தேதி கைது செய்யப்பட்டு, செப்டம்பர் 29-ஆம் தேதி வரை ஏற்கனவே விளக்கமறியலில் வைக்கப்பட்டுள்ளார்.

இந்நிலையில், கைது செய்யப்பட்ட இரு பெண்களும் நுகேகொட நீதவான் நீதிமன்றத்தில் ஆஜர்படுத்தப்பட்டதைத் தொடர்ந்து, செப்டம்பர் 29-ஆம் தேதி வரை விளக்கமறியலில் வைக்க நீதிமன்றம் உத்தரவிட்டுள்ளது.