அக்குறணை குருகொட சந்திப் பகுதியில் கோர விபத்து: லொறி மோதி நால்வர் பலி; எட்டு பேர் காயம்!

சீமெந்து கலவை ஏற்றிச் சென்ற லொறி ஒன்று சாரதியின் கட்டுப்பாட்டை இழந்தமையே இந்த விபத்துக்குக் காரணம் எனப் பொலிஸார் சந்தேகிக்கின்றனர்.

கட்டுப்பாட்டை இழந்த லொறி, வீதியில் பயணித்த முச்சக்கர வண்டிகள், லொறிகள் மற்றும் மோட்டார் சைக்கிள்கள் உட்பட சுமார் எட்டு வாகனங்கள் மீது மோதியுள்ளதுடன், அந்தப் பகுதியில் நடந்து சென்ற பாதசாரிகளையும் அடித்துச் சென்றுள்ளது.

இச்சம்பவத்தில் உயிரிழந்த நால்வரில் ஒரு பெண்ணும் மூன்று ஆண்களும் அடங்குவதாகத் தகவல்கள் வெளியாகியுள்ளன. விபத்தில் காயமடைந்தவர்கள் உடனடியாக அக்குறணைப் பிரதேச வைத்தியசாலையில் அனுமதிக்கப்பட்டு மேலதிக சிகிச்சைகளைப் பெற்று வருவதுடன், சம்பவம் தொடர்பில் பொலிஸார் தீவிர விசாரணைகளை முன்னெடுத்து வருகின்றனர்.