புறக்கோட்டையில் நுகர்வோர் அதிகாரசபை அதிரடி: 801 பிளாஸ்டிக் போத்தல்கள் கைப்பற்றல்!

பறிமுதல் செய்யப்பட்ட போத்தல்கள் தொடர்பில் நுகர்வோர் விவகார அதிகாரசபையினால் தீவிர விசாரணைகள் முன்னெடுக்கப்பட்டு வருகின்றன. விசாரணைகள் நிறைவடைந்ததும், சம்பந்தப்பட்ட வியாபார உரிமையாளர்களுக்கு எதிராக நீதவான் நீதிமன்றத்தில் சட்ட நடவடிக்கை எடுக்கப்படும் என அதிகாரசபை தெரிவித்துள்ளது.  

மீண்டும் பயன்படுத்தக்கூடிய பிளாஸ்டிக் போத்தல்களுக்கு SLS 1616 தரச்சான்றிதழ் கட்டாயமாக்கப்பட்டுள்ளது. உள்ளூரில் உற்பத்தியாகும் போத்தல்களில் இலங்கை தரக்கட்டளைகள் நிறுவனத்தின் (SLSI) 'SLS' முத்திரை பொறிக்கப்பட்டிருக்க வேண்டும் என்றும், இறக்குமதி செய்யப்படும் போத்தல்கள் பரிசோதனைக்கு உட்படுத்தப்பட்டு அனுமதி பெற்றிருக்க வேண்டும் என்றும் அறிவிக்கப்பட்டுள்ளது.  

பொதுமக்கள் பிளாஸ்டிக் போத்தல்களைக் கொள்முதல் செய்யும்போது உரிய தரச்சான்றுகளை உறுதிப்படுத்திக் கொள்ளுமாறும், சந்தை முறைகேடுகள் குறித்து 1977 என்ற அவசர இலக்கத்திற்குத் தகவல் தெரிவிக்குமாறும் கேட்டுக்கொள்ளப்பட்டுள்ளனர்.