உலகிலேயே சிகரெட் விலை மிக அதிகம் உள்ள நாடு இலங்கை! - ஒக்ஸ்போர்ட் எகனாமிக்ஸ் ஆய்வில் அதிர்ச்சி!

உலக சுகாதார ஸ்தாபனத்தின் 2024 ஆம் ஆண்டு தரவுகளை மேற்கோள் காட்டி வெளியிடப்பட்டுள்ள இந்த அறிக்கையில், இலங்கையில் சட்டப்பூர்வமாக விற்பனை செய்யப்படும் சிகரெட்டுகளின் சில்லறை விலையில் 80 சதவீதத்திற்கும் அதிகமான பகுதி அரசாங்க வரிகளாகவே பெறப்படுவதாகத் தெரிவிக்கப்பட்டுள்ளது.

புகையிலைப் பொருட்களுக்கு 75 சதவீத வரி விதிக்க வேண்டும் என்ற உலக சுகாதார அமைப்பின் பரிந்துரையின் செயல்திறன் குறித்தும் இந்த அறிக்கை கேள்விகளை எழுப்பியுள்ளது.

சிகரெட் விலையில் வரியின் சதவீதத்தை விட நுகர்வோர் செலுத்த வேண்டிய இறுதிச் சில்லறை விலையே அவர்களின் கொள்வனவுப் பழக்கத்தைத் தீர்மானிக்கிறது. எனவே, அனைத்து நாடுகளுக்கும் ஒரே மாதிரியான சர்வதேச வரி விதிப்பு முறைகளைப் பின்பற்றுவதை விட, நாட்டின் பொருளாதார நிலைமை, மக்களின் வருமான மட்டம் மற்றும் சட்டவிரோதப் புகையிலைச் சந்தையின் நிலை ஆகியவற்றைக் கருத்தில் கொண்டே புகையிலை வரிக் கொள்கைகள் வகுக்கப்பட வேண்டும் என ஒக்ஸ்போர்ட் எகனாமிக்ஸ் நிறுவனம் தனது அறிக்கையில் வலியுறுத்தியுள்ளது.