10 நிமிடத்தில் நாவில் கரையும் சுவையான பொட்டுக்கடலை அல்வா!

பொதுவாக அல்வா என்றாலே கோதுமை, பாசிப்பருப்பு அல்லது கேரட் கொண்டு செய்ய பல மணி நேரம் ஆகும் என்று நினைப்போம். ஆனால், சத்துக்கள் நிறைந்த பொட்டுக்கடலையைக் கொண்டு மிகக் குறைந்த நேரத்தில் அருமையான அல்வாவை சமைக்க முடியும்.

தேவையான பொருட்கள்:  

பொட்டுக்கடலை - 1 கப்  

வெல்லம் (பொடித்தது) - 2 கப் (அல்லது சர்க்கரை)  

நெய் - 4 முதல் 5 ஸ்பூன்

முந்திரி, பாதாம் பருப்பு - சிறிதளவு

ஏலக்காய் தூள் - அரை ஸ்பூன்

தண்ணீர் - தேவையான அளவு

செய்முறை விளக்கம்:  

பொடி தயாரித்தல்: முதலில் எடுத்துக்கொண்ட 1 கப் பொட்டுக்கடலையை மிக்ஸி ஜாரில் சேர்த்து, நைசாக பொடியாக அரைத்துக்கொள்ளவும். பின்னர் அதில் சிறிது தண்ணீர் சேர்த்து கட்டியில்லாமல் கரைத்து வைத்துக் கொள்ள வேண்டும்.  

பாகு தயாரித்தல்: அடுப்பில் கடாயை வைத்து, பொடித்த வெல்லத்துடன் சிறிது தண்ணீர் சேர்த்து வெல்லம் கரையும் வரை கொதிக்க விடவும். பாகு பதம் வரத் தேவையில்லை, வெல்லம் கரைந்தால் போதும்.

அல்வா கிண்டுதல்: இப்போது மற்றொரு கடாயில் சிறிதளவு நெய் ஊற்றி, முந்திரி மற்றும் பாதம்பருப்பை வறுத்து தனியாக வைத்துக் கொள்ளவும். அதே கடாயில் கரைத்து வைத்துள்ள பொட்டுக்கடலை விழுதை ஊற்றி மிதமான தீயில் கிளற வேண்டும்.  

சுவை சேர்ப்பு: கைவிடாமல் கிளறும் போதே, கரைத்து வைத்துள்ள வெல்லப் பாகை வடிகட்டி அதனுடன் சேர்க்கவும். கலவை கெட்டியாக மாறும் போது,மீதமுள்ள நெய்யை சிறிது சிறிதாகச் சேர்த்து நன்றாகக் கிளற வேண்டும்.

இறுதி வடிவம்: அல்வா கடாயில் ஒட்டாமல் திரண்டு வரும் பக்குவத்தில், ஏலக்காய் தூள் மற்றும் வறுத்த முந்திரியைச் சேர்த்து இறக்கினால், நாவில கரையும் சுவையான பொட்டுக்கடலை அல்வா தயார்!

சத்தான இந்த பொட்டுக்கடலை அல்வாவை உங்கள் வீட்டிலும் செய்து பார்த்து, உங்கள் குடும்பத்தினருக்கு அசத்துங்கள்!