திலீபன் சிலை அகற்றம்: அம்பாறை பகுதியில் பேரெழுச்சியுடன் இடம்பெற்ற கவனயீர்ப்புப் போராட்டம்!

வடக்கு, கிழக்கு வலிந்து காணாமல் ஆக்கப்பட்டோரின் உறவினர்களின் சங்கத்தினரால் இதன்போது வெளியிடப்பட்ட கண்டன அறிக்கையில், கடந்த பல தசாப்தங்களாகத் தமிழ் மக்கள் சந்தித்து வரும் தொடர் அநீதிகளின் ஒரு அங்கமாகவே இச்சம்பவம் பார்க்கப்படுவதாகச் சுட்டிக்காட்டப்பட்டுள்ளது.

காணாமலாக்கப்பட்ட சொந்த உறவுகளுக்கு என்ன நடந்தது என்ற உண்மைக்கான நீதியைத் தேடி பல ஆண்டுகளாக வீதிகளில் இறங்கிப் போராடி வரும் தமக்கு நீதி வழங்கத் தவறிய இலங்கை அரசும் பொலிஸாரும், தற்போது புனிதமான நினைவேந்தல் உரிமைகளையும் பறிக்கத் துணிந்துள்ளதாக போராட்டக்காரர்கள் குற்றம் சுமத்தியுள்ளனர்.

நல்லூர் மண்ணில் பலவந்தமாக அகற்றப்பட்ட தியாக தீபம் திலீபன் அவர்களின் திருவுருவச் சிலையை, எவ்வித நிபந்தனையுமின்றி, பொலிஸாரின் தலையீடுகளின்றி உடனடியாக மீண்டும் அதே இடத்தில் மீள நிறுவ வேண்டும் என அவர்கள் கோரிக்கை விடுத்துள்ளனர்.

தமிழ் மக்கள் தமது வரலாற்றையும், இன விடுதலைக்காகத் தம் உயிர்களைத் தியாகம் செய்தவர்களையும் நினைவுகூரும் ஜனநாயக உரிமையில் பாதுகாப்புத் தரப்பினர் தலையிடுவதை உடனடியாக நிறுத்த வேண்டும் என்றும், நினைவேந்தல் அடையாளங்களை அழிப்பதன் மூலமும் அச்சத்தை ஏற்படுத்துவதன் மூலமும் மக்களின் நீதிக்கான குரலை முடக்கிவிட முடியாது எனவும் அந்த அறிக்கையில் எச்சரிக்கப்பட்டுள்ளது.