முல்லைத்தீவு, மன்னாரில் 2027-இல் தகவல் தொழில்நுட்ப வளநிலையங்கள்: பிரதமர் ஹரிணி அமரசூரிய உறுதி!

பாராளுமன்றத்தில் நடைபெற்ற வினா நேரத்தின்போது வன்னி மாவட்ட நாடாளுமன்ற உறுப்பினர் துரைராசா ரவிகரன் எழுப்பிய கேள்விக்குப் பதிலளிக்கும்போதே பிரதமர் இதனைக் குறிப்பிட்டார்.

முல்லைத்தீவு கல்வி வலயத்தில் பெரும்பாலான கணினிகள் மற்றும் பல்லூடக எறிவைகள் (Multimedia Projectors) செயலிழந்துள்ளதாகச் சுட்டிக்காட்டப்பட்டமை நியாயமானது எனத் தெரிவித்த பிரதமர், 2014 ஆம் ஆண்டுக்குப் பின்னர் பல பகுதிகளுக்குப் புதிய உபகரணங்கள் வழங்கப்படவில்லை என்பதை உறுதிப்படுத்தினார்.

இதனை நிவர்த்தி செய்யும் வகையில், கல்வித் துறைக்காக அரசாங்கம் தயாரித்து வரும் ஐந்தாண்டுச் செயற்றிட்டம் 2027 ஆம் ஆண்டுக்கான வரவுசெலவுத் திட்டத்தில் முன்மொழியப்படவுள்ளதாகத் தெரிவித்தார். 

இதன் கீழ் பழுதடைந்த உபகரணங்களைப் பழுதுபார்த்தல், புதிய உபகரணங்களை வழங்குதல் மற்றும் முல்லைத்தீவு, மன்னாரில் புதிய ஐ.டி. வளநிலையங்களை அமைத்தல் போன்ற நடவடிக்கைகள் முன்னெடுக்கப்படும் எனவும் பிரதமர் உறுதியளித்தார்.