அதிக விலைக்குப் போத்தல் குடிநீர் விற்பனை: எல்ல உணவகத்திற்கு 10 இலட்சம் ரூபாய் அபராதம்!

எல்ல, புகையிரத நிலைய வீதியில் அமைந்துள்ள குறித்த உணவகத்தில் நுகர்வோர் விவகார அதிகார சபையின் அதிகாரிகளால் திடீர் சோதனை நடவடிக்கை மேற்கொள்ளப்பட்டது. இதன்போது, 2025 ஏப்ரல் மாதம் அமுலிலிருந்த வர்த்தமானி அறிவித்தலின் படி 100 ரூபாயாக நிர்ணயிக்கப்பட்டிருந்த 1 லீட்டர் போத்தல் குடிநீரை, 200 ரூபாய்க்கு விற்பனை செய்தமை கண்டுபிடிக்கப்பட்டது.

இது தொடர்பான வழக்கு நேற்று பண்டாரவளை நீதவான் நீதிமன்றத்தில் விசாரணைக்கு எடுத்துக்கொள்ளப்பட்ட போது, பிரதிவாதி நிறுவனம் தனது குற்றத்தை ஒப்புக்கொண்டதனைத் தொடர்ந்து நீதவான் இந்த அதிரடி அபராதத் தீர்ப்பை வழங்கினார்.

இவ்வழக்கில் குறிப்பிடப்பட்ட 100 ரூபாய் என்பது பழைய விலை எனக் குறிப்பிட்டுள்ள நுகர்வோர் விவகார அதிகார சபை, 2026 ஜூன் 10 ஆம் திகதியிட்ட புதிய அதிவிசேட வர்த்தமானி அறிவித்தலின் படி தற்போது அமுலிலுள்ள அதிகபட்ச சில்லறை விலைப் பட்டியலையும் வெளியிட்டுள்ளது:

500 மி.லீ - 999 மி.லீ: ரூ. 80

1 லீட்டர் - 1.499 லீட்டர்: ரூ. 120

1.5 லீட்டர் - 1.999 லீட்டர்: ரூ. 150

2 லீட்டர் - 2.499 லீட்டர்: ரூ. 180

5 லீட்டர் - 6.999 லீட்டர்: ரூ. 400

(இதற்கமைய, தற்போதைய நிலவரப்படி 1 லீட்டர் குடிநீர் போத்தலின் அதிகபட்ச விலை 120 ரூபாயாகும்).

சுற்றுலாப் பகுதிகளிலோ அல்லது உணவகங்களிலோ வியாபாரம் செய்கிறோம் என்ற காரணத்தைக் கூறி, நிர்ணயிக்கப்பட்ட விலையை விட அதிகத் தொகையை அறவிடுவதை எக்காரணம் கொண்டும் அனுமதிக்க முடியாது என அதிகாரசபை எச்சரித்துள்ளது.

பொதுமக்கள் போத்தல் குடிநீரைக் கொள்வனவு செய்யும்போது தற்போதைய கட்டுப்பாட்டு விலையைச் சரிபார்த்து வாங்குமாறும், ரசீதுகளைப் (Receipts) பெற்றுக்கொள்ளுமாறும் கேட்டுக்கொள்ளப்பட்டுள்ளனர். அதிக விலைக்குப் பொருட்களை விற்பனை செய்யும் வர்த்தகர்களுக்கு எதிராக 1977 என்ற குறுகிய தொலைபேசி இலக்கத்திற்குத் தொடர்புகொண்டு புகார்களைப் பதிவு செய்ய முடியும் எனவும் அறிவிக்கப்பட்டுள்ளது.