இலங்கை ஊடாக பாகிஸ்தான் பொருட்களை இந்தியாவுக்கு இறக்குமதி செய்த பிரம்மாண்ட மோசடி அம்பலம்!

இப்போலி இறக்குமதி நெட்வொர்க்கில் ஈடுபட்ட நால்வர் கைது செய்யப்பட்டுள்ளதாக இந்திய அதிகாரப்பூர்வ தகவல்கள் தெரிவிக்கின்றன. 

பாகிஸ்தானில் இருந்து நேரடியாகவோ அல்லது மறைமுகமாகவோ பொருட்களை இறக்குமதி செய்ய இந்தியா தடை விதித்துள்ள நிலையில், இக்கடத்தல் நெட்வொர்க் கொழும்பு துறைமுகத்தைப் பயன்படுத்தியுள்ளது.  

பாகிஸ்தானில் இருந்து கப்பல் மூலம் இலங்கைக்குக் கொண்டுவரப்பட்ட பாறை உப்பு உள்ளிட்ட பொருட்களை, இலங்கையில் இருந்து ஏற்றுமதி செய்யப்படுவதாகப் போலி சான்றிதழ்கள் மற்றும் துபாய் நிறுவனங்களின் பெயரிலான போலிப் பட்டியல்களை தயாரித்து இந்திய துறைமுகங்களுக்கு அனுப்பிவைத்துள்ளனர். 

இந்தியாவின் குஜராத்தில் உள்ள முண்ட்ரா மற்றும் கண்ட்லா துறைமுகங்கள் வழியாக சுமார் 73 லட்சம் கிலோகிராம் எடையுள்ள (295 கொள்கலன்கள்) பாகிஸ்தானிய பொருட்கள் இவ்வாறாக நாட்டிற்குள் கொண்டுவரப்பட்டுள்ளதாகக் கண்டறியப்பட்டுள்ளது.  

இலங்கை சுங்கத் திணைக்களத்தின் ஆவணங்களையும், இந்தியாவில் தாக்கல் செய்யப்பட்ட ஆவணங்களையும் ஒப்பிட்டு ஆய்வு செய்தபோதே இந்த மோசடி துல்லியமாக கண்டுபிடிக்கப்பட்டது.

இச்சம்பவத்தில் பாகிஸ்தான், ஐக்கிய அரபு அமீரகம், இலங்கை மற்றும் இந்தியாவைச் சேர்ந்த வர்த்தகர்கள் அடங்கிய சர்வதேச பின்னணி இருப்பது அம்பலமாகியுள்ளது. இது தொடர்பாக கைது செய்யப்பட்ட நான்கு நபர்களிடமும் மேலதிக விசாரணைகள் தீவிரமாக நடைபெற்று வருகின்றன.