2015 – 2016 நிலக்கரி கொள்வனவு முறைக்கேடு: ஒப்பந்தத்தை மாற்றம் செய்து தரமற்ற நிலக்கரி வாங்கியதாக ஆணைக்குழுவில் அம்பலம்!

கடந்த 2015 – 2016 ஆம் ஆண்டு காலப்பகுதியில் இடம்பெற்ற நிலக்கரி கொள்வனவின் போது, மூல ஒப்பந்தத்தில் மாற்றங்களைச் செய்தே தரமற்ற நிலக்கரி கொள்வனவு செய்யப்பட்டதாக ஜனாதிபதி விசாரணை ஆணைக்குழுவின் விசாரணைகளில் திடுக்கிடும் தகவல்கள் வெளியாகியுள்ளன.

குறிப்பிட்ட காலப்பகுதியில் நிலக்கரி கொள்வனவுக்கான ஒப்பந்த விதிமுறைகள் மற்றும் தரக் கட்டுப்பாடுகள் தன்னிச்சையாக மாற்றம் செய்யப்பட்டுள்ளதாக ஆணைக்குழு முன் சமர்ப்பிக்கப்பட்ட ஆவணங்கள் மற்றும் சாட்சியங்கள் மூலம் தெரியவந்துள்ளது.

இந்த ஒப்பந்த மாற்றங்கள் மற்றும் தரமற்ற நிலக்கரியைக் கொள்வனவு செய்வதற்கான அதிகாரப்பூர்வ ஆவணங்களில், லங்கா நிலக்கரி நிறுவனத்தின் அன்றைய தலைவரான மைத்திரி குணரத்னவே கையொப்பமிட்டுள்ளதாக விசாரணைகளின் போது சாட்சியமளிக்கப்பட்டுள்ளது.

தரமற்ற நிலக்கரியைக் கொள்வனவு செய்ததால் மின் உற்பத்தியில் தடங்கல்கள் ஏற்பட்டதுடன், இதன் மூலம் அரசாங்கத்திற்குப் பல மில்லியன் ரூபாய் நிதி இழப்பு ஏற்பட்டுள்ளதாக ஆணைக்குழுவில் சுட்டிக்காட்டப்பட்டது.

இந்த நிலக்கரி கொள்வனவு முறைக்கேடு தொடர்பான மேலதிக விசாரணைகளை ஜனாதிபதி ஆணைக்குழு தொடர்ந்து முன்னெடுத்து வருகின்றது.