நவம்பரில் மூன்று சமையல் எரிவாயு கப்பல்கள் வருகை: லாஃப்ஸ் நிறுவனத்தின் அறிவிப்பு

தற்போதைய எரிவாயு விநியோகத் தடைகள் காரணமாக நுகர்வோர் எதிர்கொள்ள வேண்டியேற்பட்டுள்ள சிரமங்கள் குறித்து லாஃப்ஸ் நிறுவனம் தனது ஆழ்ந்த வருத்தத்தைத் தெரிவித்துள்ளது. விநியோகத்தை விரைவில் இயல்பு நிலைக்குக் கொண்டுவருவதற்குத் தொடர்ச்சியாக அர்ப்பணிப்புடன் செயல்பட்டு வருவதாகவும் அந்த நிறுவனம் வலியுறுத்தியுள்ளது.

அதற்கமைய, நவம்பர் மாதத்தில் வரவிருக்கும் சமையல் எரிவாயு கப்பல்களின் விவரங்கள் பின்வருமாறு:

OQT விநியோகஸ்தர் (ஹம்பாந்தோட்டை துறைமுகம்): நவம்பர் 12 - 14

Geogas விநியோகஸ்தர் (கொழும்பு துறைமுகம்): நவம்பர் 15 - 17

OQT விநியோகஸ்தர் (ஹம்பாந்தோட்டை துறைமுகம்): நவம்பர் 24 - 28

மத்திய கிழக்கு பிராந்தியத்தில் நிலவும் மோதல்கள் மற்றும் ஹோர்முஸ் நீரிணையில் ஏற்படும் கடற்போக்குவரத்துத் தடைகள் காரணமாக உலகளாவிய எரிவாயு விநியோகச் சங்கிலி பாதிக்கப்பட்டுள்ளது. இலங்கையின் விநியோகப் பாதுகாப்பிற்காக லாஃப்ஸ் நிறுவனம் ஹம்பாந்தோட்டையில் 30,000 மெட்ரிக் தொன் சேமிப்புத் திறன் கொண்ட இறக்குமதி மற்றும் ஏற்றுமதி முனையத்திற்காக 65 மில்லியன் அமெரிக்க டொலர் முதலீட்டை மேற்கொண்டுள்ளது.

எவ்வாறாயினும், முதலீட்டுச் சபையின் 'கமர்ஷியல் ஹப்' (Commercial Hub) கட்டமைப்பின் நிபந்தனைகள் மற்றும் கடந்த கால பொருளாதார நெருக்கடிகள் காரணமாக மறுஏற்றுமதி மட்டங்களைப் பேணுவதில் தடைகள் ஏற்பட்டதால், இந்த முனையத்தை உள்நாட்டுச் சந்தைக்குப் பயன்படுத்துவது வரையறுக்கப்பட்டிருந்தது. தற்போது இந்த முனையத்தை உள்நாட்டு விநியோகங்களுக்காகப் பயன்படுத்துவதற்கு மூன்று மாத கால தற்காலிக அனுமதியைக் கோரி வருவதாக அந்நிறுவனம் குறிப்பிட்டுள்ளது.

ஜனாதிபதியின் அறிவுறுத்தலுக்கு அமைய, தேவையான அனுமதிகளை ஒரு வாரத்திற்குள் வழங்குமாறு திறைசேரியின் செயலாளருக்கு அறிவிக்கப்பட்டுள்ளதாக முதலீட்டுச் சபையின் தலைவர் உறுதிப்படுத்தியுள்ள போதிலும், இதுவரை உரிய அனுமதி கிடைக்கவில்லை என லாஃப்ஸ் நிறுவனம் சுட்டிக்காட்டியுள்ளது. மேலும், உரிய கட்டுப்பாட்டு அனுமதிகள் கிடைத்தவுடன் எரிவாயு விநியோகத்தை முறைப்படி மீண்டும் ஆரம்பிக்க எதிர்பார்ப்பதாகவும் நுகர்வோருக்கு உறுதியளித்துள்ளது.