இலங்கைத் தமிழர்களின் உரிமைகள் குறித்து இந்தியாவுடன் பேச்சு: எம்பி சிறிநாத் தகவல்

மட்டக்களப்பில் உள்ள அவரது அலுவலகத்தில் நடைபெற்ற ஊடகவியலாளர் சந்திப்பின் போதே அவர் மேற்கண்டவாறு குறிப்பிட்டார். கடந்த வாரம் தமிழ்நாடு மற்றும் புதுடெல்லிக்கு விஜயம் செய்து பல்வேறு அரசியல் தலைவர்களைச் சந்தித்துக் கலந்துரையாடியதாக அவர் தெரிவித்தார்.

டெல்லி பல்கலைக்கழகத்தில் நடைபெற்ற ஒப்பீட்டு ஆய்வு மாநாட்டில் பிரதான பேச்சாளராகப் பங்கேற்றதாகவும், அவருடன் கஜேந்திரகுமார் பொன்னம்பலம் மற்றும் வெளிநாட்டுத் தமிழ் அமைப்புக்களின் பிரதிநிதிகளும் கலந்துகொண்டதாகவும் அவர் குறிப்பிட்டார். இந்த விஜயத்தின் போது தமிழக அரசின் அமைச்சர்கள், விடுதலைச் சிறுத்தைகள் கட்சி மற்றும் பாரதிய ஜனதா கட்சியின் முக்கிய தலைவர்களைச் சந்தித்து இலங்கைப் பிரச்சினைகள் குறித்துப் பேசியுள்ளதாக அவர் தெரிவித்தார்.

இலங்கையில் புதிய அரசாங்கம் அமைந்துள்ளபோதிலும், தமிழ் மக்களின் பிரச்சினைகளுக்குத் தீர்வு காணப்படாமை, அரசியல் தீர்வு முயற்சிகளில் காணப்படும் இழுத்தடிப்புகள், காணிப் பிரச்சினைகள் மற்றும் தொல்பொருள் திணைக்களத்தின் ஊடாக ஆலயங்களுக்கு ஏற்படுத்தப்படும் நெருக்கடிகள் போன்றவற்றை இந்தியத் தரப்பினரிடம் விரிவாக எடுத்துரைத்ததாக அவர் கூறினார். குறிப்பாக திருகோணமலை சிவன் ஆலய விவகாரம் மற்றும் புதிய சட்டம் குறித்த அச்சங்களையும் வெளிப்படுத்தியுள்ளதாகத் தெரிவித்தார்.

மேலும், இந்திய நிதியமைச்சரைச் சந்தித்துத் தமிழ் மக்களின் நிலைமைகள் குறித்து விளக்கியதாகவும், இலங்கைத் தமிழர்களின் பிரச்சினைகள் குறித்துப் பிரதமர் நரேந்திர மோடி மற்றும் வெளியுறவுத்துறை அமைச்சரின் கவனத்திற்குக் கொண்டு செல்வதாகவும், உரிமைகளைப் பெற்றுக்கொடுக்க இராஜதந்திர ரீதியில் நடவடிக்கை எடுப்பதாகவும் அவர் உறுதியளித்ததாக எம்பி சிறிநாத் தெரிவித்தார். இந்தியாவில் வசிக்கும் இலங்கை அகதிகளின் மறுவாழ்வு மற்றும் குடியுரிமை கோரிக்கைகள் குறித்தும், இலங்கை - இந்திய மீனவர் பிரச்சினை தொடர்பாகவும் அப்போது விவாதிக்கப்பட்டதாக அவர் மேலும் குறிப்பிட்டார்.