சுகாதாரத் துறையில் சர்வதேச சாதனை: இலங்கைக்கு உலக சுகாதார ஸ்தாபனம் (WHO) உயரிய பாராட்டு!

தாய் மற்றும் பச்சிளம் குழந்தைகளுக்கான டெட்டனஸ் (தசை இறுக்க நோய்) ஒழிப்பு மற்றும் மலேரியா இல்லாத நிலை என்பவற்றை ஒரு தசாப்த காலமாகத் தொடர்ந்து பேணி வருவதற்காக இலங்கை உள்ளிட்ட தெற்காசிய நாடுகளுக்கு உலக சுகாதார ஸ்தாபனம் (WHO) தனது கௌரவத்தையும் பாராட்டையும் தெரிவித்துள்ளது.

மலேரியா நோயற்ற நாடாக இலங்கை பெற்றுக்கொண்ட சர்வதேச சான்றிதழைத் தொடர்ந்து 10 ஆண்டுகளாக எவ்வித தொற்றுகளுமின்றிப் பேணி வருவது உலகளாவிய பொதுச் சுகாதாரத் துறையில் ஒரு முக்கிய மைல்கல்லாகக் கருதப்படுகிறது.

தாய்மார்கள் மற்றும் பிறந்த குழந்தைகளைத் தாக்கும் அபாயகரமான டெட்டனஸ் நோயை முற்றாக ஒழித்த நிலையைத் கடந்த ஒரு தசாப்த காலமாகத் தக்கவைத்துக்கொண்டு சாதனை படைக்கப்பட்டுள்ளது.

பொதுச் சுகாதாரக் கட்டமைப்பை வலுவாகப் பேணுவதிலும், நோய்த் தடுப்பு நடவடிக்கைகளைத் தடையின்றி முன்னெடுப்பதிலும் இலங்கை உள்ளிட்ட தெற்காசிய பிராந்திய நாடுகள் காட்டிவரும் அர்ப்பணிப்பை உலக சுகாதார ஸ்தாபனம் வெகுவாகப் பாராட்டியுள்ளது.

சுகாதாரப் பணியாளர்களின் அர்ப்பணிப்பு மிக்க சேவை மற்றும் அரசின் தொடர்ச்சியான விழிப்புணர்வு திட்டங்களே இந்த சர்வதேச வெற்றிக்கு முக்கிய காரணம் என சுகாதாரத் துறை அதிகாரிகள் சுட்டிக்காட்டியுள்ளனர்.