துபாயில் இருந்து நாடு கடத்தப்பட்ட ‘கொண்ட ரஞ்சி’ கட்டுநாயக்க விமான நிலையத்தில் அதிரடி கைது!

துபாயில் கைது செய்யப்பட்டு இலங்கைக்கு நாடு கடத்தப்பட்ட பிரபல பாதாள உலகக் குழு உறுப்பினரான ரஞ்சித் குமார் என்ற ‘கொண்ட ரஞ்சி’, கட்டுநாயக்க சர்வதேச விமான நிலையத்தில் வச்சு குற்றப்புலனாய்வுத் திணைக்கள (CID) அதிகாரிகளால் அதிரடியாகக் கைது செய்யப்பட்டுள்ளார்.

துபாயில் இருந்து இன்று (செப்டம்பர் 9) காலை 7.50 மணியளவில் இலங்கை வந்தடைந்த விமானத்தில் இருந்து இறங்கியபோதே, தயாராக இருந்த குற்றப்புலனாய்வுத் திணைக்கள அதிகாரிகள் அவரைத் தங்கள் பொறுப்பில் எடுத்தனர்.

 போதைப்பொருள் கடத்தல் மற்றும் ஒழுங்கமைக்கப்பட்ட குற்றச் செயல்களில் ஈடுபட்டு வந்த இவர், போலி கடவுச்சீட்டைப் பயன்படுத்தி தப்பிச் செல்ல முயன்றபோது துபாயில் கைது செய்யப்பட்டுத் தடுத்து வைக்கப்பட்டிருந்தார்.

இலங்கையில் பல்வேறு கொலைகள், கப்பம் கோருதல் மற்றும் போதைப்பொருள் கடத்தல் சம்பவங்களுடன் தொடர்புடைய இவர், போதைப்பொருள் மூலம் ஈட்டிய கோடிக்கணக்கான பணத்தை சட்டவிரோதமான முறையில் வெளிநாடுகளுக்கு அனுப்பிய குற்றச்சாட்டிலும் தேடப்பட்டு வந்தார்.

கைது செய்யப்பட்ட கொண்ட ரஞ்சியிடம் குற்றப்புலனாய்வுத் திணைக்கள அதிகாரிகள் தீவிர விசாரணை மேற்கொண்டு வருவதுடன், ஆரம்பக் கட்ட விசாரணைகளுக்குப் பிறகு அவரை நீதிமன்றத்தில் ஆஜர்படுத்த நடவடிக்கை எடுத்து வருகின்றனர்.

இலங்கையில் பாதாள உலகக் குழுக்கள் மற்றும் போதைப்பொருள் வலையமைப்பை ஒடுக்கும் நோக்கில் முன்னெடுக்கப்படும் நடவடிக்கைகளில் இந்த வீழ்ச்சி ஒரு முக்கிய மைல்கல்லாகப் பார்க்கப்படுகிறது.