சிறுவர்களின் பாதுகாப்பை உறுதிசெய்ய புதிய நடவடிக்கை: அமைச்சரவையில் தாக்கல் செய்யப்பட்ட பத்திரம்!

இலங்கையில் சிறுவர்களின் பாதுகாப்பை மிக நுட்பமாகவும் உறுதியாகவும் பாதுகாக்கும் நோக்கில், பெண்களுக்கான மற்றும் சிறுவர் விவகார அமைச்சு ஒரு புதிய சட்ட ரீதியிலான நடைமுறையை அறிவித்துள்ளது.

இதன்படி, சிறுவர்களுடன் நேரடியாகத் தொடர்பு கொள்ளும் அனைத்து அரசுப் பணிகளுக்கும் 'சிறுவர் குற்றப் பின்னணி இல்லா சான்றிதழ்' சமர்ப்பிப்பது கட்டாயமாக்கப்படவுள்ளது.

 அரச தகவல் திணைக்களத்தில் நடைபெற்ற ஊடகவியலாளர் சந்திப்பில் பேசிய பெண்கள் மற்றும் சிறுவர் விவகார அமைச்சர் சரோஜா சாவித்திரி போல்ராஜ், இதற்கான அமைச்சரவைப் பத்திரம் ஏற்கனவே ஒப்புதலுக்காகச் சமர்ப்பிக்கப்பட்டுள்ளதாகத் தெரிவித்தார்.

பாடசாலைகள், சிறுவர் பராமரிப்பு மையங்கள், காப்பகங்கள் மற்றும் மருத்துவமனைகள் போன்ற சிறுவர்களுடன் நேரடி தொடர்புடைய பொதுத்துறைப் பணிகளில் சேர விரும்பும் நபர்கள், பொலிஸார் அல்லது உரிய அரசு அதிகாரப்பூர்வ நிறுவனங்களிடம் இருந்து தங்களுக்கு எதிரான சிறுவர் குற்றச்சாட்டுகளோ அல்லது பின்னணியோ இல்லை என்பதை உறுதிப்படுத்தும் சான்றிதழைப் பெற வேண்டும்.

இக்கட்டுப்பாடு புதிய நியமனங்களுக்கு மட்டுமன்றி, ஏற்கனவே அரசுப் பணியில் இருக்கும் ஊழியர்களுக்கும் பொருந்தும். ஊழியர்கள் தங்களின் தகுதித் தேர்வுகள் , சம்பள உயர்வு பெறும்போது மற்றும் பணி மதிப்பீடுகளின் போது இச்சான்றிதழைத் தொடர்ச்சியாகப் புதுப்பித்துச் சமர்ப்பிக்க வேண்டியது அவசியமாகும்.  

சிறுவர்களுடன் பழகும் வாய்ப்புள்ள பதவிகளில், குற்றப்பின்னணி கொண்ட நபர்கள் நுழைவதைத் தடுப்பதும், பொதுத்துறையில் பணியாற்றும் ஊழியர்களின் பொறுப்புணர்வை வாழ்நாள் முழுவதும் உறுதிப்படுத்துவதுமே இத்திட்டத்தின் முக்கிய நோக்கமாகும். 

சுமார் 1.2 மில்லியனுக்கும் அதிகமான அரசு ஊழியர்களைக் கொண்ட இலங்கையில், விரைவில் மேற்கொள்ளப்படவுள்ள புதிய அரசுப் பணியாளர் சேர்க்கைக்கு முன்னதாக இத்தகைய பாதுகாப்புத் திட்டம் கொண்டு வரப்படுவது சிறுவர் பாதுகாப்பு கட்டமைப்பை மேலும் வலுப்படுத்தும் என எதிர்பார்க்கப்படுகிறது.