வடக்கு, கிழக்கில் உணர்வெழுச்சியுடன் தொடங்கிய தியாகத் தீபம் திலீபனின் 39ஆவது ஆண்டு நினைவேந்தல்!

நேற்று (15) காலை 9.45 மணியளவில், திலீபன் தனது வரலாற்று முக்கியத்துவம் வாய்ந்த உண்ணாவிரதப் போராட்டத்தை ஆரம்பித்த அதே நேரத்தில் அஞ்சலி நிகழ்வுகள் ஆரம்பமாகின. வரலாற்றுச் சிறப்புமிக்க யாழ்ப்பாணம் நல்லூர் கந்தசுவாமி கோவில் சுற்றாடலில் அமைந்துள்ள திலீபனின் நினைவிடத்தில் பொதுச்சுடர் ஏற்றி, உருவப்படத்திற்கு மலர் மாலை அணிவித்து பொதுமக்கள் மற்றும் மக்கள் பிரதிநிதிகள் சுடரேற்றி அஞ்சலி செலுத்தினர்.

அதேவேளை, கிளிநொச்சி, முல்லைத்தீவு, மட்டக்களப்பு, திருகோணமலை உள்ளிட்ட வடக்கு, கிழக்கின் பல்வேறு பகுதிகளிலும், தமிழர்கள் வாழும் புலம்பெயர் நாடுகளிலும் நினைவேந்தல் சுடர்கள் ஏற்றப்பட்டு மலரஞ்சலி செலுத்தப்பட்டு வருகிறது.

இன்றிலிருந்து தியாகத் தீபம் திலீபன் ஈகச்சாவடைந்த செப்டம்பர் 26ஆம் திகதி வரையிலான 12 நாட்களுக்குத் தொடர்ச்சியாக இந்த நினைவேந்தல் நிகழ்வுகள் தமிழர் தாயகப் பகுதிகளில் உணர்வெழுச்சியுடன் நடைபெறவுள்ளமை குறிப்பிடத்தக்கது.