80 மில்லியன் டொலர்களை சட்டவிரோதமாக அனுப்பியவர் விளக்கமறியலில்!

டெலிகிராபிக் ட்ரான்ஸ்ஃபர் (T/T) முறைமையைப் பயன்படுத்தி, 80 மில்லியன் அமெரிக்க டொலர்களை சட்டவிரோதமான முறையில் வெளிநாட்டு கணக்குகளுக்கு அனுப்பியதாகக் கூறப்படும் சம்பவத்துடன் தொடர்புடைய சந்தேகநபர் எதிர்வரும் 17 ஆம் திகதி வரை விளக்கமறியலில் வைக்கப்பட்டுள்ளார்.

மருதானைப் பகுதியில் வைத்து பொலிஸ் நிதி மோசடி விசாரணைப் பிரிவினரால் (FCID) இந்த சந்தேகநபர் அண்மையில் கைது செய்யப்பட்டார்.

கைது செய்யப்பட்ட நபர் 2023 ஆம் ஆண்டு முதல் 2025 ஆம் ஆண்டு வரையிலான காலப்பகுதியில், நாட்டின் சட்டத்திட்டங்களை மீறி இவ்வாறு பெருந்தொகையான வெளிநாட்டுச் செலாவணியை வெளிநாடுகளிலுள்ள கணக்குகளுக்கு மாற்றியுள்ளமை ஆரம்பகட்ட விசாரணைகளில் தெரியவந்துள்ளது.

சம்பவம் தொடர்பில் பொலிஸ் நிதி மோசடி விசாரணைப் பிரிவினர் மேலதிக விசாரணைகளை மேற்கொண்டு வருகின்றனர்.