இலங்கை போக்குவரத்து சபையின் 2,000க்கும் அதிகமான பஸ்கள் முடக்கம்: பிரதி அமைச்சர் வெளியிட்ட அதிர்ச்சி புள்ளிவிபரம்!

நாடாளுமன்றத்தில் இன்று உறுப்பினர் ரோஹித அபேகுணவர்தன எழுப்பிய கேள்விக்கு பதிலளித்த நெடுஞ்சாலைகள் மற்றும் போக்குவரத்து பிரதி அமைச்சர் பிரசன்ன குணசேன, இலங்கை போக்குவரத்துச் சபையின் தற்போதைய பேருந்து விபரங்களை வெளியிட்டார்.

இதன்படி, பதிவு செய்யப்பட்டுள்ள 7,130 பேருந்துகளில் 6,987 சாதாரண பேருந்துகளும், 143 சொகுசு பேருந்துகளும் அடங்குவதாகக் குறிப்பிட்ட அவர், இருப்பினும் 5,000 பேருந்துகள் மட்டுமே தற்சமயம் சேவையில் ஈடுபடுத்தப் பொருத்தமான நிலையில் இருப்பதை வெளிப்படுத்தினார்.

மேலும், மாகாண மட்டத்தில் மேல் மாகாணத்தில் அதிகபட்சமாக 5,524 தனியார் பேருந்துகளும், குறைந்தபட்சமாக வடமத்திய மாகாணத்தில் 509 பேருந்துகளும் இயங்கி வருவதாக அவர் தெரிவித்தார்.

அத்துடன், தேசிய போக்குவரத்து ஆணைக்குழுவினால் கடந்த அக்டோபர் 1-ஆம் திகதி வரை 2,966 தனியார் பேருந்துகளுக்கு அனுமதிப்பத்திரங்கள் வழங்கப்பட்டுள்ளதாகவும், அதில் சாதாரண, அரை சொகுசு, சொகுசு மற்றும் அதி சொகுசுப் பேருந்துகள் அடங்குவதாகவும் பிரதி அமைச்சர் மேலும் சுட்டிக்காட்டினார்.