கட்டுநாயக்கவில் பரபரப்பு: புகைமூட்டம் காரணமாக ஸ்ரீலங்கன் விமானம் அவசரத் தரையிறக்கம்!

மெல்போர்னிலிருந்து புறப்பட்டு நேற்று இரவு 10.38 மணியளவில் கட்டுநாயக்கவை வந்தடையவிருந்த UL-605 என்ற ஏ-330 வகை விமானத்திலேயே இந்த அவசர நிலைமை ஏற்பட்டுள்ளது.

விமானம் தரையிறங்குவதற்கு 15 நிமிடங்களுக்கு முன்பு விமானத்தினுள் திடீரெனப் புகைமூட்டம் பரவியுள்ளது. இது குறித்து உடனடியாக விமான நிலைய இயக்க அறைக்கு விமானி தகவல் அளித்துள்ளார். இதனைத் தொடர்ந்து, விமான நிலைய தீயணைப்பு வாகனங்கள், மருத்துவர்கள், மீட்புப் படையினர் மற்றும் அம்பியூலன்ஸ்கள் அனைத்தும் தீவிர எச்சரிக்கை நிலையில் வைக்கப்பட்டுத் தயார்ப்படுத்தப்பட்டன.

எனினும், விமானியின் திறமையான மற்றும் சாதுரியமான கையாளுகையினால் எந்தவித விபத்துமின்றி விமானம் கட்டுநாயக்க விமான நிலையத்தில் பாதுகாப்பாகத் தரையிறக்கப்பட்டது. இந்த விமானத்தில் 258 பயணிகளும், 15 விமானக் குழுவினரும் அடங்கலாக மொத்தம் 273 பேர் பயணித்துள்ளனர்.

விமானம் தரையிறக்கப்பட்ட பின்னர் மேற்கொள்ளப்பட்ட விரிவான பரிசோதனைகளில், சரக்குக் கிடங்கில் வைக்கப்பட்டிருந்த இறைச்சித் தொகைக்கு இடப்பட்டிருந்த நைதரசன் உலர் பனிக்கட்டி (Dry Ice) காரணமாகவே இந்த புகைமூட்டம் உருவாகியுள்ளமை கண்டறியப்பட்டது.

இதனைத் தொடர்ந்து விமானத்தில் மேலதிக சோதனைகள் நடத்தப்பட்டு, எந்தவிதப் பிரச்சினையும் இல்லை என்பது உறுதி செய்யப்பட்டதைத் தொடர்ந்து, இன்று காலை வேறொரு பயணத்திற்காக அந்த விமானம் கட்டுநாயக்கவிலிருந்து வெற்றிகரமாகப் புறப்பட்டுச் சென்றுள்ளதாக ஸ்ரீலங்கன் விமானப் போக்குவரத்து நிறுவனத்தின் தொடர்பாடல் பிரிவின் தலைவர் தீபால் பெரேரா உறுதிப்படுத்தியுள்ளார்.