இலங்கை சுங்கத்தில் டிஜிட்டல் புரட்சி: காகிதமற்ற ஆவண செயலாக்க முறைமை இன்று அறிமுகம்!

இதன் மூலம், சுங்கப் பிரகடனங்களுக்காக இதுவரை பயன்படுத்தப்பட்டு வந்த பாரம்பரிய காகித ஆவண முறைகள் முற்றாக நிறுத்தப்பட்டு, புதிய டிஜிட்டல் தொழில்நுட்ப முறைமையின் கீழ் மட்டுமே ஆவணங்கள் ஏற்றுக்கொள்ளப்படும் என இலங்கை சுங்கத் திணைக்களத்தின் ஊடகப் பேச்சாளர் சந்தன புஞ்சிஹேவா தெரிவித்துள்ளார்.

புதிய அமைப்பானது டிஜிட்டல் கையொப்பங்களுடன் அசிகுடா (ASYCUDA World) முறைமையுடன் நேரடியாக ஒருங்கிணைக்கப்பட்டு, பாதுகாப்பான முறையில் இணையவழியில் ஆவணங்களைச் சமர்ப்பிக்க வழிவகை செய்கிறது.

டிஜிட்டல் கையொப்பம் பதிவிடப்பட்ட பின்னர் ஆவணங்களில் செய்யப்படும் மாற்றங்களைக் கண்டறியும் தொழில்நுட்ப வசதி இதில் உள்ளதால், சுங்க அனுமதி நடைமுறைகளின் வெளிப்படைத்தன்மை அதிகரித்து, ஊழல் மற்றும் மோசடிகள் பெருமளவில் கட்டுப்படுத்தப்படும்.

இறக்குமதி மற்றும் ஏற்றுமதிப் பொருட்களுக்கான சுங்க அனுமதி நேரத்தை இது கணிசமாகக் குறைப்பதுடன், ஆவணக் கையாளுகைக்கான நேரடிச் செலவுகளையும் குறைக்கும்.

இப்புதிய டிஜிட்டல் மாற்றம் நாட்டின் வர்த்தக நடவடிக்கைகளை விரைவுபடுத்துவதுடன், சுங்கத் திணைக்களத்தின் வருமானத்தை மேலும் உயர்த்த வழிவகுக்கும் என்றும் எதிர்பார்க்கப்படுகிறது.